Shiva-Prelude

अगस्त्य उवाच - अश्वानन महाबुद्धे सर्वशास्त्रविशारद । कथितं ललितादेव्याः चरितं परमाद्भुतम्

agastya uvāca - aśvānana mahābuddhe sarvaśāstraviśārada | kathitaṃ lalitādevyāḥ caritaṃ paramādbhutam

पूर्वं प्रादुर्भवो मातुः ततः पट्टाभिषेचनम् । भण्डासुरवधश्चैव विस्तरेण त्वयोदितः

pūrvaṃ prādurbhavo mātuḥ tataḥ paṭṭābhiṣecanam | bhaṇḍāsuravadhaścaiva vistareṇa tvayoditaḥ

वर्णितं श्रीपुरं चापि महाविभवविस्तरम् । श्रीमत्पञ्चदशाक्षर्याः महिमा वर्णितस्तथा

varṇitaṃ śrīpuraṃ cāpi mahāvibhavavistaram | śrīmatpañcadaśākṣaryāḥ mahimā varṇitastathā

षोढान्यासादयो देव्याः न्यासखण्डे समीरिताः । अन्तर्यागक्रमश्चैव बहिर्यागक्रमस्तथा

ṣoḍhānyāsādayo devyāḥ nyāsakhaṇḍe samīritāḥ | antaryāgakramaścaiva bahiryāgakramastathā

महायागाक्रमश्चापि पूजाखण्डे समीरिताः । पुरश्चरणखण्डे तु जपलक्षणमीरितम्

mahāyāgākramaścāpi pūjākhaṇḍe samīritāḥ | puraścaraṇakhaṇḍe tu japalakṣaṇamīritam

होमखण्डे त्वया प्रोक्तो होमद्रव्यविधिक्रमः । चक्रराजस्य विद्यायाः श्रीदेव्या देशिकान्मनोः

homakhaṇḍe tvayā prokto homadravyavidhikramaḥ | cakrarājasya vidyāyāḥ śrīdevyā deśikānmanoḥ

रहस्यखण्डे तादात्म्यं परस्परमुदीरितम् । स्तोत्रखण्डे बहुविधाः स्तुतयः परिकीर्तिताः

rahasyakhaṇḍe tādātmyaṃ parasparamudīritam | stotrakhaṇḍe bahuvidhāḥ stutayaḥ parikīrtitāḥ

मन्त्रिणीदण्डिनीदेव्योः प्रोक्ते नामसहस्रके । न तु श्रीललितादेव्याः प्रोक्तं नामसहस्रकम्

mantriṇīdaṇḍinīdevyoḥ prokte nāmasahasrake | na tu śrīlalitādevyāḥ proktaṃ nāmasahasrakam

तत्र मे संशयो जातो हयग्रीव दयानिधे । किं वा त्वया विस्मृतं तज्ज्ञात्वा वा समुपेक्षितम्

tatra me saṃśayo jāto hayagrīva dayānidhe | kiṃ vā tvayā vismṛtaṃ tajjñātvā vā samupekṣitam

मम वा योग्यता नास्ति श्रोतुं नामसहस्रकम् । किमर्थं भवता नोक्तं तत्र मे कारणं वद

mama vā yogyatā nāsti śrotuṃ nāmasahasrakam | kimarthaṃ bhavatā noktaṃ tatra me kāraṇaṃ vada

सूत उवाच - इति पृष्टो हयग्रीवो मुनिना कुम्भजन्मना । प्रहृष्टो वचनं प्राह तापसं कुम्भसम्भवम्

sūta uvāca - iti pṛṣṭo hayagrīvo muninā kumbhajanmanā | prahṛṣṭo vacanaṃ prāha tāpasaṃ kumbhasambhavam

श्रीहयग्रीव उवाच - लोपामुद्रापतेऽगस्त्य सावधानमनाः शृणु । नाम्रां सहस्रं यन्नोक्तं कारणं तद्वदामि ते

śrīhayagrīva uvāca - lopāmudrāpate'gastya sāvadhānamanāḥ śṛṇu | nāmrāṃ sahasraṃ yannoktaṃ kāraṇaṃ tadvadāmi te

रहस्यमिति मत्वाऽहं नोक्तवांस्ते न चान्यथा । पुनश्च पृच्छते भक्त्या तस्मात्तत्ते वदाम्यहम्

rahasyamiti matvā'haṃ noktavāṃste na cānyathā | punaśca pṛcchate bhaktyā tasmāttatte vadāmyaham

ब्रूयाच्छिष्याय भक्ताय रहस्यमपि देशिकः । भवता न प्रदेयं स्यादभक्ताय कदाचन

brūyācchiṣyāya bhaktāya rahasyamapi deśikaḥ | bhavatā na pradeyaṃ syādabhaktāya kadācana

न शठाय न दुष्टाय नाविश्वासाय कर्हिचित् । श्रीमातृभक्तियुक्त्ताय श्रीविद्याराजवेदिने

na śaṭhāya na duṣṭāya nāviśvāsāya karhicit | śrīmātṛbhaktiyukttāya śrīvidyārājavedine

उपासकाय शुद्धाय देयं नामसहस्रकम् । यानि नामसहस्राणि सद्यः सिद्धिप्रदानि वै

upāsakāya śuddhāya deyaṃ nāmasahasrakam | yāni nāmasahasrāṇi sadyaḥ siddhipradāni vai

तन्त्रेषु ललितादेव्यास्तेषु मुख्यमिदं मुने । श्रीविद्यैव तु मन्त्राणां तत्र कादिर्यथा परा

tantreṣu lalitādevyāsteṣu mukhyamidaṃ mune | śrīvidyaiva tu mantrāṇāṃ tatra kādiryathā parā

पुराणां श्रीपुरमिव शक्तीनां ललिता यथा । श्रीविद्योपासकानां च यथा देवः परः शिवः

purāṇāṃ śrīpuramiva śaktīnāṃ lalitā yathā | śrīvidyopāsakānāṃ ca yathā devaḥ paraḥ śivaḥ

तथा नामसहस्रेषु परमेतत्प्रकीर्तितम् । यथास्य पठनाद्देवी प्रीयते ललिताम्बिका

tathā nāmasahasreṣu parametatprakīrtitam | yathāsya paṭhanāddevī prīyate lalitāmbikā

अन्यनामसहस्रस्य पाठान्न प्रीयते तथा । श्रीमातुः प्रीतये तस्मादनिशं कीर्तयेदिदम्

anyanāmasahasrasya pāṭhānna prīyate tathā | śrīmātuḥ prītaye tasmādaniśaṃ kīrtayedidam

बिल्वपत्रैश्चक्रराजे योऽर्चयेल्ललिताम्बिकाम् । पद्मैर्वा तुलसीपुष्पैरेभिर्नामसहस्रकैः

bilvapatraiścakrarāje yo'rcayellalitāmbikām | padmairvā tulasīpuṣpairebhirnāmasahasrakaiḥ

सदा प्रसादं कुरुते तस्य सिंहासनेश्वरी । चक्राधिराजमभ्यर्च्य जप्त्वा पञ्चदशाक्षरीम्

sadā prasādaṃ kurute tasya siṃhāsaneśvarī | cakrādhirājamabhyarcya japtvā pañcadaśākṣarīm

जपान्ते कीर्तयेन्नित्यमिदं नामसहस्रकम् । जपपूजाद्यशक्तश्चेत् पठेन्नामसहस्रकम्

japānte kīrtayennityamidaṃ nāmasahasrakam | japapūjādyaśaktaścet paṭhennāmasahasrakam

साङ्गार्चने साङ्गजपे यत्फलं तदाप्नुयात् । उपासने स्तुतीरन्याः पठेदभ्युदयो हि सः

sāṅgārcane sāṅgajape yatphalaṃ tadāpnuyāt | upāsane stutīranyāḥ paṭhedabhyudayo hi saḥ

इदं नामसहस्रं तु कीर्तयेन्नित्यकर्मवत् । चक्रराजार्चनं देव्या जपो नाम्नां च कीर्तनम्

idaṃ nāmasahasraṃ tu kīrtayennityakarmavat | cakrarājārcanaṃ devyā japo nāmnāṃ ca kīrtanam

भक्तस्य कृत्यमेतावदन्यदभ्युदयं विदुः । भक्तस्यावश्यकमिदं नामसाहस्रकीर्तनम्

bhaktasya kṛtyametāvadanyadabhyudayaṃ viduḥ | bhaktasyāvaśyakamidaṃ nāmasāhasrakīrtanam

तत्र हेतुं प्रवक्ष्यामि शृणु त्वं कुम्भसम्भव । पुरा श्रीललितादेवी भक्तानां हितकाम्यया

tatra hetuṃ pravakṣyāmi śṛṇu tvaṃ kumbhasambhava | purā śrīlalitādevī bhaktānāṃ hitakāmyayā

वाग्देवीर्वशिनीमुख्याः समाहूयेदमब्रवीत् । देव्युवाच - वाग्देवता वशिन्याद्याः शृणुध्वं वचनं मम

vāgdevīrvaśinīmukhyāḥ samāhūyedamabravīt | devyuvāca - vāgdevatā vaśinyādyāḥ śṛṇudhvaṃ vacanaṃ mama

भवत्यो मत्प्रसादेन प्रोल्लसद्वाग्विभूतयः । मद्भक्तानां वाग्विभूतिप्रदाने विनियोजिताः

bhavatyo matprasādena prollasadvāgvibhūtayaḥ | madbhaktānāṃ vāgvibhūtipradāne viniyojitāḥ

मच्चक्रस्य रहस्यज्ञा मम नामपरायणाः । मम स्तोत्रविधानाय तस्मादाज्ञापयामि वः

maccakrasya rahasyajñā mama nāmaparāyaṇāḥ | mama stotravidhānāya tasmādājñāpayāmi vaḥ

कुरुध्वमङ्कितं स्तोत्रं मम नामसहस्रकैः । येन भक्तैः स्तुताया मे सद्यः प्रीतिः परा भवेत्

kurudhvamaṅkitaṃ stotraṃ mama nāmasahasrakaiḥ | yena bhaktaiḥ stutāyā me sadyaḥ prītiḥ parā bhavet

हयग्रीव उवाच - इत्याज्ञप्तास्ततो देव्यः श्रीदेव्या ललिताम्बया । रहस्यैर्नामभिर्दिव्यैश्चक्रुः स्तोत्रमनुत्तमम्

hayagrīva uvāca - ityājñaptāstato devyaḥ śrīdevyā lalitāmbayā | rahasyairnāmabhirdivyaiścakruḥ stotramanuttamam

रहस्यं नामसाहस्रमिति तद्विश्रुतं परम् । ततः कदाचित्सदसि स्थित्वा सिंहासनेऽम्बिका

rahasyaṃ nāmasāhasramiti tadviśrutaṃ param | tataḥ kadācitsadasi sthitvā siṃhāsane'mbikā

स्वसेवावसरं प्रादात् सर्वेषां कुम्भसम्भव । सेवार्थमागतास्तत्र तु वाणीस्रष्टुकोटयः

svasevāvasaraṃ prādāt sarveṣāṃ kumbhasambhava | sevārthamāgatāstatra tu vāṇīsraṣṭukoṭayaḥ

लक्ष्मीनारायणानां च कोटयः समुपागताः । गौरीकोटिसमेतानां रुद्राणामपि कोटयः

lakṣmīnārāyaṇānāṃ ca koṭayaḥ samupāgatāḥ | gaurīkoṭisametānāṃ rudrāṇāmapi koṭayaḥ

मन्त्रिणीदण्डिनीमुख्याः सेवार्थं यास्समागताः । शक्तयो विविधाकारास्तासां संख्या न विद्यते

mantriṇīdaṇḍinīmukhyāḥ sevārthaṃ yāssamāgatāḥ | śaktayo vividhākārāstāsāṃ saṃkhyā na vidyate

दिव्यौघा मानवौघाश्च सिद्धौघाश्च समागताः । तत्र श्रीललितादेवी सर्वेषां दर्शनं ददौ

divyaughā mānavaughāśca siddhaughāśca samāgatāḥ | tatra śrīlalitādevī sarveṣāṃ darśanaṃ dadau

तेषु दृष्ट्वोपविष्टेषु स्वे स्वे स्थाने यथाक्रमम् । ततः श्रीललितादेवीकटाक्षाक्षेपचोदिताः

teṣu dṛṣṭvopaviṣṭeṣu sve sve sthāne yathākramam | tataḥ śrīlalitādevīkaṭākṣākṣepacoditāḥ

उत्थाय वशिनीमुख्या बद्धांजलिपुटास्तदा । अस्तुवन्नामसाहस्रैः स्वकृतैर्लंलिताम्बिकाम्

utthāya vaśinīmukhyā baddhāṃjalipuṭāstadā | astuvannāmasāhasraiḥ svakṛtairlaṃlitāmbikām

श्रुत्वा स्तवं प्रसन्नाऽभूल्ल्लिता परमेश्वरी । ते सर्वे विस्मयं जग्भुर्ये तत्र सदसि स्थिताः

śrutvā stavaṃ prasannā'bhūlllitā parameśvarī | te sarve vismayaṃ jagbhurye tatra sadasi sthitāḥ

ततः प्रोवाच ललिता सदस्यान् देवतागणान् । ममाज्ञयैव वाग्देव्यश्चक्रुः स्तोत्रमनुत्तमम्

tataḥ provāca lalitā sadasyān devatāgaṇān | mamājñayaiva vāgdevyaścakruḥ stotramanuttamam

अङ्कितं नामभिर्दिव्यैर्मम प्रीतिविधायकैः । तत्पठध्वं सदा यूयं स्तोत्रं मत्प्रीतिवृद्धये

aṅkitaṃ nāmabhirdivyairmama prītividhāyakaiḥ | tatpaṭhadhvaṃ sadā yūyaṃ stotraṃ matprītivṛddhaye

प्रवर्तयध्वं भक्तेषु मम नामसहस्रकम् । इदं नामसहस्रं मे यो भक्तः पठते सकृत्

pravartayadhvaṃ bhakteṣu mama nāmasahasrakam | idaṃ nāmasahasraṃ me yo bhaktaḥ paṭhate sakṛt

स मे प्रियतमो ज्ञेयस्तस्मै कामान्ददाम्यहम् । श्रीचक्रे मां सदाभ्यर्च्य जप्त्वा पञ्चदशाक्षरीम्

sa me priyatamo jñeyastasmai kāmāndadāmyaham | śrīcakre māṃ sadābhyarcya japtvā pañcadaśākṣarīm

पश्चान्नामसहस्रं मे कीर्तयेन्मम तुष्टये । मामर्चयतु वा मा वा विद्यां जपतु वा न वा

paścānnāmasahasraṃ me kīrtayenmama tuṣṭaye | māmarcayatu vā mā vā vidyāṃ japatu vā na vā

कीर्तयेन्नामसहस्रमिदं मत्प्रीतये सदा । मत्प्रीत्या सकलान् कामांल्लभते नात्र संशयः

kīrtayennāmasahasramidaṃ matprītaye sadā | matprītyā sakalān kāmāṃllabhate nātra saṃśayaḥ

तस्मान्नामसहस्रं मे कीर्तयध्वं सदादरात् । श्रीहयग्रीव उवाच - इति श्रीललितेशानी शास्ति देवान्सहानुगान्

tasmānnāmasahasraṃ me kīrtayadhvaṃ sadādarāt | śrīhayagrīva uvāca - iti śrīlaliteśānī śāsti devānsahānugān

तदाज्ञया तदारभ्य ब्रह्मविष्णुमहेश्वराः । शक्तयो मन्त्रिणीमुख्या इदं नामसहस्रकम्

tadājñayā tadārabhya brahmaviṣṇumaheśvarāḥ | śaktayo mantriṇīmukhyā idaṃ nāmasahasrakam

पठन्ति भक्त्या सततं ललितापरितुष्टये । तस्मादवश्यं भक्तेन कीर्तनीयमिदं मुने

paṭhanti bhaktyā satataṃ lalitāparituṣṭaye | tasmādavaśyaṃ bhaktena kīrtanīyamidaṃ mune

आवश्यकत्वे हेतुस्ते मया प्रोक्तो मुनीश्वर । इदानीं नामसाहस्रं वक्ष्यामि श्रद्धया शृणु

āvaśyakatve hetuste mayā prokto munīśvara | idānīṃ nāmasāhasraṃ vakṣyāmi śraddhayā śṛṇu