Phalashruti

श्रीशिवा शिवशक्त्यैक्यरूपिणी ललिताम्बिका । एवं श्रीललिता देव्या नाम्नां साहस्रकं जगुः ॥ ॥ इति श्रीब्रह्माण्ड पुराणे उत्तरखण्डे श्रीहयग्रीवागस्त्यसंवादे श्रीललितासहस्रनामस्तोत्रकथनं सम्पूर्णम् ॥ फलश्रुतिः (क्षमाख्या द्वादशी कला) इत्येतन्नामसाहस्रं कथितं ते घटोद्भव । रहस्यानां रहस्यं च ललिताप्रीतिदायकम्

śrīśivā śivaśaktyaikyarūpiṇī lalitāmbikā | evaṃ śrīlalitā devyā nāmnāṃ sāhasrakaṃ jaguḥ || || iti śrībrahmāṇḍa purāṇe uttarakhaṇḍe śrīhayagrīvāgastyasaṃvāde śrīlalitāsahasranāmastotrakathanaṃ sampūrṇam || phalaśrutiḥ (kṣamākhyā dvādaśī kalā) ityetannāmasāhasraṃ kathitaṃ te ghaṭodbhava | rahasyānāṃ rahasyaṃ ca lalitāprītidāyakam

अनेन सदृशं स्तोत्रं न भूतं न भविष्यति । सर्वरोगप्रशमनं सर्वसम्पत्प्रवर्धनम्

anena sadṛśaṃ stotraṃ na bhūtaṃ na bhaviṣyati | sarvarogapraśamanaṃ sarvasampatpravardhanam

सर्वापमृत्युशमनं कालमृत्युनिवारणम् । सर्वज्वरार्तिशमनं दीर्घायुष्यप्रदायकम्

sarvāpamṛtyuśamanaṃ kālamṛtyunivāraṇam | sarvajvarārtiśamanaṃ dīrghāyuṣyapradāyakam

पुत्रप्रदमपुत्राणां पुरुषार्थप्रदायकम् । इदं विशेषाच्छ्रीदेव्याः स्तोत्रं प्रीतिविधायकम्

putrapradamaputrāṇāṃ puruṣārthapradāyakam | idaṃ viśeṣācchrīdevyāḥ stotraṃ prītividhāyakam

जपेन्नित्यं प्रयत्नेन ललितोपास्तितत्परः । प्रातः स्नात्वा विधानेन सन्ध्याकर्म समाप्य च

japennityaṃ prayatnena lalitopāstitatparaḥ | prātaḥ snātvā vidhānena sandhyākarma samāpya ca

पूजागृहं ततो गत्वा चक्रेराजं समर्चयेत् । विद्यां जपेत् सहस्रं वा त्रिशतं शतमेव वा

pūjāgṛhaṃ tato gatvā cakrerājaṃ samarcayet | vidyāṃ japet sahasraṃ vā triśataṃ śatameva vā

रहस्यनामसाहस्रमिदं पश्चात्पठेन्नरः । जन्ममध्ये सकृच्चापि य एतत्पठते सुधीः

rahasyanāmasāhasramidaṃ paścātpaṭhennaraḥ | janmamadhye sakṛccāpi ya etatpaṭhate sudhīḥ

तस्य पुण्यफलं वक्ष्ये शृणु त्वं कुम्भसम्भव । गङ्गादि सर्वतीर्थेषु यः स्नायात्कोटिजन्मसु

tasya puṇyaphalaṃ vakṣye śṛṇu tvaṃ kumbhasambhava | gaṅgādi sarvatīrtheṣu yaḥ snāyātkoṭijanmasu

कोटिलिङ्गप्रतिष्ठां च यः कुर्यादविमुक्तके । कुरुक्षेत्रे तु यो दद्यात्कोटिवारं रविग्रहे

koṭiliṅgapratiṣṭhāṃ ca yaḥ kuryādavimuktake | kurukṣetre tu yo dadyātkoṭivāraṃ ravigrahe

कोटिं सौवर्णभाराणां श्रोत्रियेषु द्विजन्मसु । यः कोटिं हयमेधानामाहरेद् गाङ्गरोधसि

koṭiṃ sauvarṇabhārāṇāṃ śrotriyeṣu dvijanmasu | yaḥ koṭiṃ hayamedhānāmāhared gāṅgarodhasi

आचरेत्कूपकोटीर्यो निर्जले मरुभूतले । दुर्भिक्षे यः प्रतिदिनं कोटिब्राह्मणभोजनम्

ācaretkūpakoṭīryo nirjale marubhūtale | durbhikṣe yaḥ pratidinaṃ koṭibrāhmaṇabhojanam

श्रद्धया परया कुर्यात्सहस्रोपरिवत्सरान् । तत्पुण्यं कोटिगुणितं लभेत्पुण्यमनुत्तमम्

śraddhayā parayā kuryātsahasroparivatsarān | tatpuṇyaṃ koṭiguṇitaṃ labhetpuṇyamanuttamam

रहस्यनामसाहस्रे नाम्नोऽप्येकस्य कीर्तनात् । रहस्यनामसाहस्रे नामैकमपि यः पठेत्

rahasyanāmasāhasre nāmno'pyekasya kīrtanāt | rahasyanāmasāhasre nāmaikamapi yaḥ paṭhet

तस्य पापानि नश्यन्ति महान्त्यपि न संशयः । नित्यकर्माननुष्ठानान्निषिद्धकरणादपि

tasya pāpāni naśyanti mahāntyapi na saṃśayaḥ | nityakarmānanuṣṭhānānniṣiddhakaraṇādapi

यत्पापं जायते पुंसां तत्सर्वं नश्यति ध्रुवम् । बहुनात्र किमुक्तेन शृणु त्वं कुम्भसम्भव

yatpāpaṃ jāyate puṃsāṃ tatsarvaṃ naśyati dhruvam | bahunātra kimuktena śṛṇu tvaṃ kumbhasambhava

अत्रैकनाम्नो या शक्तिः पातकानां निवर्तने । तन्निवर्त्यमघं कर्तुं नालं लोकाश्चतुर्दश

atraikanāmno yā śaktiḥ pātakānāṃ nivartane | tannivartyamaghaṃ kartuṃ nālaṃ lokāścaturdaśa

यस्त्यक्त्वा नामसाहस्रं पापहानिमभीप्सति । स हि शीतनिवृत्यर्थं हिमशैले निषेवते

yastyaktvā nāmasāhasraṃ pāpahānimabhīpsati | sa hi śītanivṛtyarthaṃ himaśaile niṣevate

भक्तो यः कीर्तयेन्नित्यमिदं नामसहस्रकम् । तस्मै श्रीलितादेवी प्रीताऽभीष्टं प्रयच्छति

bhakto yaḥ kīrtayennityamidaṃ nāmasahasrakam | tasmai śrīlitādevī prītā'bhīṣṭaṃ prayacchati

अकीर्तयन्निदं स्तोत्रं कथं भक्तो भविष्यति । नित्यं सङ्कीर्तनाशक्तः कीर्तयेत्पुण्यवासरे

akīrtayannidaṃ stotraṃ kathaṃ bhakto bhaviṣyati | nityaṃ saṅkīrtanāśaktaḥ kīrtayetpuṇyavāsare

संक्रान्तौ विषुवे चैव स्वजन्मत्रितयेऽयने । नवम्यां वा चतुर्दश्यां सितायां शुक्रवासरे

saṃkrāntau viṣuve caiva svajanmatritaye'yane | navamyāṃ vā caturdaśyāṃ sitāyāṃ śukravāsare

कीर्तयेन्नामसाहस्रं पौर्णमास्यां विशेषतः । पौर्णमास्यां चन्द्रबिम्बे ध्यात्वा श्रीललिताम्बिकाम्

kīrtayennāmasāhasraṃ paurṇamāsyāṃ viśeṣataḥ | paurṇamāsyāṃ candrabimbe dhyātvā śrīlalitāmbikām

पञ्चोपचारैः सम्पूज्य पठेन्नामसहस्रकम् । सर्वे रोगाः प्रणश्यन्ति दीर्घमायुश्च विन्दति

pañcopacāraiḥ sampūjya paṭhennāmasahasrakam | sarve rogāḥ praṇaśyanti dīrghamāyuśca vindati

अयमायुष्करो नाम प्रयोगः कल्पचोदितः । ज्वरार्तं शिरसि स्पृष्ट्वा पठेन्नामसहस्रकम्

ayamāyuṣkaro nāma prayogaḥ kalpacoditaḥ | jvarārtaṃ śirasi spṛṣṭvā paṭhennāmasahasrakam

तत्क्षणात्प्रशमं याति शिरस्तोदो ज्वरोऽपि च । सर्वव्याधिनिवृत्त्यर्थं स्पृष्ट्वा भस्म जपेदिदम्

tatkṣaṇātpraśamaṃ yāti śirastodo jvaro'pi ca | sarvavyādhinivṛttyarthaṃ spṛṣṭvā bhasma japedidam

तद्भस्मधारणादेव नश्यन्ति व्याधयः क्षणात् । जलं सम्मन्त्र्य कुम्भस्थं नामसाहस्रतो मुने

tadbhasmadhāraṇādeva naśyanti vyādhayaḥ kṣaṇāt | jalaṃ sammantrya kumbhasthaṃ nāmasāhasrato mune

अभिषिञ्चेद्ग्रहग्रस्तान्ग्रहा नश्यन्ति तत्क्षणात् । सुधासागरमध्यस्थां ध्यात्वा श्रीललिताम्बिकाम्

abhiṣiñcedgrahagrastāngrahā naśyanti tatkṣaṇāt | sudhāsāgaramadhyasthāṃ dhyātvā śrīlalitāmbikām

यः पठेन्नामसाहस्रं विषं तस्य विनश्यति । वन्ध्यानां पुत्रलाभाय नामसाहस्रमन्त्रितम्

yaḥ paṭhennāmasāhasraṃ viṣaṃ tasya vinaśyati | vandhyānāṃ putralābhāya nāmasāhasramantritam

नवनीतं प्रदद्यात्तु पुत्रलाभो भवेद्ध्रुवम् । देव्याः पाशेन सम्बद्धामाकृष्टामङ्कुशेन च

navanītaṃ pradadyāttu putralābho bhaveddhruvam | devyāḥ pāśena sambaddhāmākṛṣṭāmaṅkuśena ca

ध्यात्वाऽभीष्टां स्त्रियं रात्रौ जपेन्नामसहस्रकम् । आयाति स्वसमीपं सा यद्यप्यन्तः पुरं गता

dhyātvā'bhīṣṭāṃ striyaṃ rātrau japennāmasahasrakam | āyāti svasamīpaṃ sā yadyapyantaḥ puraṃ gatā

राजाकर्षणकामश्चेद्राजावसथदिङ्मुखः । त्रिरात्रं यः पठेदेतच्छ्रीदेवीध्यानतत्परः

rājākarṣaṇakāmaścedrājāvasathadiṅmukhaḥ | trirātraṃ yaḥ paṭhedetacchrīdevīdhyānatatparaḥ

स राजा पारवश्येन तुरङ्गं वा मतङ्गजम् । आरुह्यायाति निकटं दासवत्प्रणिपत्य च

sa rājā pāravaśyena turaṅgaṃ vā mataṅgajam | āruhyāyāti nikaṭaṃ dāsavatpraṇipatya ca

तस्मै राज्यं च कोशं च ददात्येव वशं गतः । रहस्यनामसाहस्रं यः कीर्तयति नित्यशः

tasmai rājyaṃ ca kośaṃ ca dadātyeva vaśaṃ gataḥ | rahasyanāmasāhasraṃ yaḥ kīrtayati nityaśaḥ

तन्मुखालोकमात्रेण मुह्येल्लोकत्रयं मुने । यस्त्विदं नामसाहस्रं सकृत्पठति भक्तिमान्

tanmukhālokamātreṇa muhyellokatrayaṃ mune | yastvidaṃ nāmasāhasraṃ sakṛtpaṭhati bhaktimān

तस्य ये शत्रवस्तेषां निहन्ता शरभेश्वरः । यो वाऽभिचारं कुरुते नामसाहस्रपाठके

tasya ye śatravasteṣāṃ nihantā śarabheśvaraḥ | yo vā'bhicāraṃ kurute nāmasāhasrapāṭhake

निवर्त्य तत्क्रियां हन्यात्तं वै प्रत्यङ्गिरा स्वयम् ॥ ये क्रूरदृष्ट्या वीक्षन्ते नामसाहस्रपाठकम्

nivartya tatkriyāṃ hanyāttaṃ vai pratyaṅgirā svayam || ye krūradṛṣṭyā vīkṣante nāmasāhasrapāṭhakam

तानन्धान्कुरुते क्षिप्रं स्वयं मार्तण्डभैरवः । धनं यो हरते चोरैर्नामसाहस्रजापिनः

tānandhānkurute kṣipraṃ svayaṃ mārtaṇḍabhairavaḥ | dhanaṃ yo harate corairnāmasāhasrajāpinaḥ

यत्र कुत्र स्थितं वापि क्षेत्रपालो निहन्ति तम् । विद्यासु कुरुते वादं यो विद्वान्नामजापिना

yatra kutra sthitaṃ vāpi kṣetrapālo nihanti tam | vidyāsu kurute vādaṃ yo vidvānnāmajāpinā

तस्य वाक्स्तम्भनं सद्यः करोति नकुलेश्वरी । यो राजा कुरुते वैरं नामसाहस्रजापिना

tasya vākstambhanaṃ sadyaḥ karoti nakuleśvarī | yo rājā kurute vairaṃ nāmasāhasrajāpinā

चतुरङ्गबलं तस्य दण्डिनी संहरेत्स्वयम् । यः पठेन्नामसाहस्रं षण्मासं भक्तिसंयुतः

caturaṅgabalaṃ tasya daṇḍinī saṃharetsvayam | yaḥ paṭhennāmasāhasraṃ ṣaṇmāsaṃ bhaktisaṃyutaḥ

लक्ष्मीश्चाञ्चल्यरहिता सदा तिष्ठति तद्गृहे । मासमेकं प्रतिदिनं त्रिवारं यः पठेन्नरः

lakṣmīścāñcalyarahitā sadā tiṣṭhati tadgṛhe | māsamekaṃ pratidinaṃ trivāraṃ yaḥ paṭhennaraḥ

भारती तस्य जिह्वाग्रे रङ्गे नृत्यति नित्यशः । यस्त्वेकवारं पठति पक्षमात्रमतन्द्रितः

bhāratī tasya jihvāgre raṅge nṛtyati nityaśaḥ | yastvekavāraṃ paṭhati pakṣamātramatandritaḥ

मुह्यन्ति कामवशगा मृगाक्ष्यस्तस्य वीक्षणात् । यः पठेन्नामसाहस्रं जन्ममध्ये सकृन्नरः

muhyanti kāmavaśagā mṛgākṣyastasya vīkṣaṇāt | yaḥ paṭhennāmasāhasraṃ janmamadhye sakṛnnaraḥ

तद्दृष्टिगोचरास्सर्वे मुच्यन्ते सर्वकिल्बिषैः । यो वेत्ति नामसाहस्रं तस्मै देयं द्विजन्मने

taddṛṣṭigocarāssarve mucyante sarvakilbiṣaiḥ | yo vetti nāmasāhasraṃ tasmai deyaṃ dvijanmane

अन्नं वस्त्रं धनं धान्यं नान्येभ्यस्तु कदाचन । श्रीमन्त्रराजं यो वेत्ति श्रीचक्रं यः समर्चति

annaṃ vastraṃ dhanaṃ dhānyaṃ nānyebhyastu kadācana | śrīmantrarājaṃ yo vetti śrīcakraṃ yaḥ samarcati

यः कीर्तयति नामानि तं सत्पात्रं विदुर्बुधाः । तस्मै देयं प्रयत्नेन श्रीदेवीप्रीतिमिच्छता

yaḥ kīrtayati nāmāni taṃ satpātraṃ vidurbudhāḥ | tasmai deyaṃ prayatnena śrīdevīprītimicchatā

न कीर्तयति नामानि मन्त्रराजं न वेत्ति यः । पशुतुल्यः स विज्ञेयस्तस्मै दत्तं निरर्थकम्

na kīrtayati nāmāni mantrarājaṃ na vetti yaḥ | paśutulyaḥ sa vijñeyastasmai dattaṃ nirarthakam

परीक्ष्य विद्याविदुषस्तेभ्यो दद्याद्विचक्षणः । श्रीमन्त्रराजसदृशो यथा मन्त्रो न विद्यते

parīkṣya vidyāviduṣastebhyo dadyādvicakṣaṇaḥ | śrīmantrarājasadṛśo yathā mantro na vidyate

देवता ललितातुल्या यथा नास्ति घटोद्भव । रहस्यनामसाहस्रतुल्या नास्ति तथा स्तुतिः

devatā lalitātulyā yathā nāsti ghaṭodbhava | rahasyanāmasāhasratulyā nāsti tathā stutiḥ

लिखित्वा पुस्तके यस्तु नामसाहस्रमुत्तमम् । समर्चयेत्सदा भक्त्या तस्य तुष्यति सुन्दरी

likhitvā pustake yastu nāmasāhasramuttamam | samarcayetsadā bhaktyā tasya tuṣyati sundarī

बहुनात्र किमुक्तेना शृणु त्वं कुम्भसम्भव । नानेन सदृशं स्तोत्रं सर्वतन्त्रेषु दृश्यते

bahunātra kimuktenā śṛṇu tvaṃ kumbhasambhava | nānena sadṛśaṃ stotraṃ sarvatantreṣu dṛśyate

तस्मादुपासको नित्यं कीर्तयेदिदमादरात् । एभिर्नामसहस्रैस्तु श्रीचक्रं योऽर्चयेत्सकृत्

tasmādupāsako nityaṃ kīrtayedidamādarāt | ebhirnāmasahasraistu śrīcakraṃ yo'rcayetsakṛt

पद्मैर्वा तुलसीपुष्पैः कल्हारैर्वा कदम्बकैः । चम्पकैर्जातिकुसुमैः मल्लिकाकरवीरकैः

padmairvā tulasīpuṣpaiḥ kalhārairvā kadambakaiḥ | campakairjātikusumaiḥ mallikākaravīrakaiḥ

उत्पलैर्बिल्वपत्रैर्वा कुन्दकेसरपाटलैः । अन्यैः सुगन्धिकुसुमैः केतकीमाधवीमुखैः

utpalairbilvapatrairvā kundakesarapāṭalaiḥ | anyaiḥ sugandhikusumaiḥ ketakīmādhavīmukhaiḥ

तस्य पुण्यफलं वक्त्तुं न शक्नोति महेश्वरः । सा वेत्ति ललितादेवी स्वचक्रार्चनजं फलम्

tasya puṇyaphalaṃ vakttuṃ na śaknoti maheśvaraḥ | sā vetti lalitādevī svacakrārcanajaṃ phalam

अन्ये कथं विजानीयुर्ब्रह्माद्याः स्वल्पमेधसः । प्रतिमासं पौर्णमास्यामेभिर्नामसहस्रकैः

anye kathaṃ vijānīyurbrahmādyāḥ svalpamedhasaḥ | pratimāsaṃ paurṇamāsyāmebhirnāmasahasrakaiḥ

रात्रौ यश्चक्रराजस्थामर्चयेत्परदेवताम् । स एव ललितारूपस्तद्रूपा ललिता स्वयम्

rātrau yaścakrarājasthāmarcayetparadevatām | sa eva lalitārūpastadrūpā lalitā svayam

न तयोर्विद्यते भेदो भेदकृत्पापकृद्भवेत् । महानवम्यां यो भक्तः श्रीदेवीं चक्रमध्यगाम्

na tayorvidyate bhedo bhedakṛtpāpakṛdbhavet | mahānavamyāṃ yo bhaktaḥ śrīdevīṃ cakramadhyagām

अर्चयेन्नामसाहस्रैस्तस्य मुक्तिः करे स्थिता । यस्तु नामसहस्रेण शुक्रवारे समर्चयेत्

arcayennāmasāhasraistasya muktiḥ kare sthitā | yastu nāmasahasreṇa śukravāre samarcayet

चक्रराजे महादेवीं तस्य पुण्यफलं शृणु । सर्वान्कामानवाप्येह सर्वसौभाग्यसंयुतः

cakrarāje mahādevīṃ tasya puṇyaphalaṃ śṛṇu | sarvānkāmānavāpyeha sarvasaubhāgyasaṃyutaḥ

पुत्रपौत्रादिसंयुक्तो भुक्त्वा भोगान्यथेप्सितान् । अन्ते श्रीललितादेव्याः सायुज्यमतिदुर्लभम्

putrapautrādisaṃyukto bhuktvā bhogānyathepsitān | ante śrīlalitādevyāḥ sāyujyamatidurlabham

प्रार्थनीयं शिवाद्यैश्च प्राप्नोत्येव न संशयः । यः सहस्रं ब्राह्मणानामेभिर्नामसहस्रकैः

prārthanīyaṃ śivādyaiśca prāpnotyeva na saṃśayaḥ | yaḥ sahasraṃ brāhmaṇānāmebhirnāmasahasrakaiḥ

समर्च्य भोजयेद्भक्त्या पायसापूपषड्रसैः । तस्मै प्रीणाति ललिता स्वसाम्राज्यं प्रयच्छति

samarcya bhojayedbhaktyā pāyasāpūpaṣaḍrasaiḥ | tasmai prīṇāti lalitā svasāmrājyaṃ prayacchati

न तस्य दुर्लभं वस्तु त्रिषु लोकेषु विद्यते । निष्कामः कीर्तयेद्यस्तु नामसाहस्रमुत्तमम्

na tasya durlabhaṃ vastu triṣu lokeṣu vidyate | niṣkāmaḥ kīrtayedyastu nāmasāhasramuttamam

ब्रह्मज्ञानमवाप्नोति येन मुच्येत बन्धनात् । धनार्थी धनमाप्नोति यशोऽर्थी चाप्नुयाद्यशः

brahmajñānamavāpnoti yena mucyeta bandhanāt | dhanārthī dhanamāpnoti yaśo'rthī cāpnuyādyaśaḥ

विद्यार्थी चाप्नुयाद्विद्यां नामसाहस्रकीर्तनात् । नानेन सदृशं स्तोत्रं भोगमोक्षप्रदं मुने

vidyārthī cāpnuyādvidyāṃ nāmasāhasrakīrtanāt | nānena sadṛśaṃ stotraṃ bhogamokṣapradaṃ mune

कीर्तनीयमिदं तस्माद्भोगमोक्षार्थिभिर्नरैः । चतुराश्रमनिष्ठैश्च कीर्तनीयमिदं सदा

kīrtanīyamidaṃ tasmādbhogamokṣārthibhirnaraiḥ | caturāśramaniṣṭhaiśca kīrtanīyamidaṃ sadā

स्वधर्मसमनुष्ठानवैकल्यपरिपूर्तये । कलौ पापैकबहुले धर्मानुष्ठानवर्जिते

svadharmasamanuṣṭhānavaikalyaparipūrtaye | kalau pāpaikabahule dharmānuṣṭhānavarjite

नामसङ्कीर्तनं मुक्त्वा नृणां नान्यत्परायणम् । लौकिकाद्वचनान्मुख्यं विष्णुनामानुकीर्तनम्

nāmasaṅkīrtanaṃ muktvā nṛṇāṃ nānyatparāyaṇam | laukikādvacanānmukhyaṃ viṣṇunāmānukīrtanam

विष्णुनामसहस्राच्च शिवनामैकमुत्तमम् । शिवनामसहस्राच्च देव्या नामैकमुत्तमम्

viṣṇunāmasahasrācca śivanāmaikamuttamam | śivanāmasahasrācca devyā nāmaikamuttamam

देवीनामसहस्राणि कोटिशः सन्ति कुम्भज । तेषु मुख्यं दशविधं नामसाहस्रमुच्यते

devīnāmasahasrāṇi koṭiśaḥ santi kumbhaja | teṣu mukhyaṃ daśavidhaṃ nāmasāhasramucyate

गङ्गा भवानी गायत्री काली लक्ष्मीः सरस्वती । राजराजेश्वरी बाला श्यामला ललिता दश

gaṅgā bhavānī gāyatrī kālī lakṣmīḥ sarasvatī | rājarājeśvarī bālā śyāmalā lalitā daśa

रहस्यनामसाहस्रमिदं शस्तं दशस्वपि । तस्मात्सङ्कीर्तयेन्नित्यं कलिदोषनिवृत्तये

rahasyanāmasāhasramidaṃ śastaṃ daśasvapi | tasmātsaṅkīrtayennityaṃ kalidoṣanivṛttaye

मुख्यं श्रीमातृनामेति न जानन्ति विमोहिताः । विष्णुनामपराः केचिच्छिवनामपराः परे

mukhyaṃ śrīmātṛnāmeti na jānanti vimohitāḥ | viṣṇunāmaparāḥ kecicchivanāmaparāḥ pare

न कश्चिदपि लोकेषु ललितानामतत्परः । येनान्य देवतानाम कीर्तितं जन्मकोटिषु

na kaścidapi lokeṣu lalitānāmatatparaḥ | yenānya devatānāma kīrtitaṃ janmakoṭiṣu

तस्यैव भवति श्रद्धा श्रीदेवीनामकीर्तने । चरमे जन्मनि यथा श्रीविद्योपासको भवेत्

tasyaiva bhavati śraddhā śrīdevīnāmakīrtane | carame janmani yathā śrīvidyopāsako bhavet

नामसाहस्रपाठश्च तथा चरमजन्मनि । यथैव विरला लोके श्रीविद्याराजवेदिनः

nāmasāhasrapāṭhaśca tathā caramajanmani | yathaiva viralā loke śrīvidyārājavedinaḥ

तथैव विरलो गुह्यनामसाहस्रपाठकः । मन्त्रराजजपश्चैव चक्रराजार्चनं तथा

tathaiva viralo guhyanāmasāhasrapāṭhakaḥ | mantrarājajapaścaiva cakrarājārcanaṃ tathā

रहस्यनामपाठश्च नाल्पस्य तपसः फलम् । अपठन्नामसाहस्रं प्रीणयेद्यो महेश्वरीम्

rahasyanāmapāṭhaśca nālpasya tapasaḥ phalam | apaṭhannāmasāhasraṃ prīṇayedyo maheśvarīm

स चक्षुषा विना रूपं पश्येदेव विमूढधीः । रहस्यनामसाहस्रं त्यक्त्वा यः सिद्धिकामुकः

sa cakṣuṣā vinā rūpaṃ paśyedeva vimūḍhadhīḥ | rahasyanāmasāhasraṃ tyaktvā yaḥ siddhikāmukaḥ

स भोजनं विना नूनं क्षुन्-निवृत्तिमभीप्सति । यो भक्तो ललितादेव्याः स नित्यं कीर्तयेदिदम्

sa bhojanaṃ vinā nūnaṃ kṣun-nivṛttimabhīpsati | yo bhakto lalitādevyāḥ sa nityaṃ kīrtayedidam

नान्यथा प्रीयते देवी कल्पकोटिशतैरपि । तस्माद्रहस्यनामानि श्रीमातुः प्रयतः पठेत्

nānyathā prīyate devī kalpakoṭiśatairapi | tasmādrahasyanāmāni śrīmātuḥ prayataḥ paṭhet

इति ते कथितं स्तोत्रं रहस्यं कुम्भसम्भव । नाविद्यावेदिने ब्रूयान्नाभक्ताय कदाचन

iti te kathitaṃ stotraṃ rahasyaṃ kumbhasambhava | nāvidyāvedine brūyānnābhaktāya kadācana

यथैव गोप्या श्रीविद्या तथा गोप्यमिदं मुने । पशुतुल्येषु न ब्रूयाज्जनेषु स्तोत्रमुत्तमम्

yathaiva gopyā śrīvidyā tathā gopyamidaṃ mune | paśutulyeṣu na brūyājjaneṣu stotramuttamam

यो ददाति विमूढात्मा श्रीविद्यारहिताय च । तस्मै कुप्यन्ति योगिन्यः सोऽनर्थः सुमहान्स्मृतः

yo dadāti vimūḍhātmā śrīvidyārahitāya ca | tasmai kupyanti yoginyaḥ so'narthaḥ sumahānsmṛtaḥ

रहस्यनामसाहस्रं तस्मात्सङ्गोपयेदिदम् । स्वतन्त्रेण मया नोक्तं तवापि कलशोद्भव

rahasyanāmasāhasraṃ tasmātsaṅgopayedidam | svatantreṇa mayā noktaṃ tavāpi kalaśodbhava

ललिताप्रेरणेनैव मयोक्तं स्तोत्रमुत्तमम् । तेन तुष्टा महादेवी तवाभीष्टं प्रदास्यति

lalitāpreraṇenaiva mayoktaṃ stotramuttamam | tena tuṣṭā mahādevī tavābhīṣṭaṃ pradāsyati

श्रीसूत उवाच - इत्युक्त्वा श्रीहयग्रीवो ध्यात्वा श्रीललिताम्बिकाम् । आनन्दमग्नहृदयः सद्यः पुलकितोऽभवत्

śrīsūta uvāca - ityuktvā śrīhayagrīvo dhyātvā śrīlalitāmbikām | ānandamagnahṛdayaḥ sadyaḥ pulakito'bhavat