Vana Parva 298 — Yaksha is Dharma; the boon

ततस्ते यक्षवचनादुदतिष्ठन्त पाण्डवाः | क्षुत्पिपासे च सर्वेषां क्षणे तस्मिन्व्यगच्छताम्

सरस्येकेन पादेन तिष्ठन्तमपराजितम् | पृच्छामि को भवान्देवो न मे यक्षो मतो भवान्

वसूनां वा भवानेको रुद्राणामथ वा भवान् | अथ वा मरुतां श्रेष्ठो वज्री वा त्रिदशेश्वरः

मम हि भ्रातर इमे सहस्रशतयोधिनः | न तं योगं प्रपश्यामि येन स्युर्विनिपातिताः

सुखं प्रतिविबुद्धानामिन्द्रियाण्युपलक्षये | स भवान्सुहृदस्माकमथ वा नः पिता भवान्

अहं ते जनकस्तात धर्मो मृदुपराक्रम | त्वां दिदृक्षुरनुप्राप्तो विद्धि मां भरतर्षभ

यशः सत्यं दमः शौचमार्जवं ह्रीरचापलम् | दानं तपो ब्रह्मचर्यमित्येतास्तनवो मम

अहिंसा समता शान्तिस्तपः शौचममत्सरः | द्वाराण्येतानि मे विद्धि प्रियो ह्यसि सदा मम

दिष्ट्या पञ्चसु रक्तोऽसि दिष्ट्या ते षट्पदी जिता | द्वे पूर्वे मध्यमे द्वे च द्वे चान्ते साम्परायिके

धर्मोऽहमस्मि भद्रं ते जिज्ञासुस्त्वामिहागतः | आनृशंस्येन तुष्टोऽस्मि वरं दास्यामि तेऽनघ

वरं वृणीष्व राजेन्द्र दाता ह्यस्मि तवानघ | ये हि मे पुरुषा भक्ता न तेषामस्ति दुर्गतिः

अरणीसहितं यस्य मृग आदाय गच्छति | तस्याग्नयो न लुप्येरन्प्रथमोऽस्तु वरो मम

अरणीसहितं तस्य ब्राह्मणस्य हृतं मया | मृगवेषेण कौन्तेय जिज्ञासार्थं तव प्रभो

ददानीत्येव भगवानुत्तरं प्रत्यपद्यत | अन्यं वरय भद्रं ते वरं त्वममरोपम

वर्षाणि द्वादशारण्ये त्रयोदशमुपस्थितम् | तत्र नो नाभिजानीयुर्वसतो मनुजाः क्वचित्

ददानीत्येव भगवानुत्तरं प्रत्यपद्यत | भूयश्चाश्वासयामास कौन्तेयं सत्यविक्रमम्

यद्यपि स्वेन रूपेण चरिष्यथ महीमिमाम् | न वो विज्ञास्यते कश्चित्त्रिषु लोकेषु भारत

वर्षं त्रयोदशं चेदं मत्प्रसादात्कुरूद्वहाः | विराटनगरे गूढा अविज्ञाताश्चरिष्यथ

यद्वः सङ्कल्पितं रूपं मनसा यस्य यादृशम् | तादृशं तादृशं सर्वे छन्दतो धारयिष्यथ

अरणीसहितं चेदं ब्राह्मणाय प्रयच्छत | जिज्ञासार्थं मया ह्येतदाहृतं मृगरूपिणा

तृतीयं गृह्यतां पुत्र वरमप्रतिमं महत् | त्वं हि मत्प्रभवो राजन्विदुरश्च ममांशभाक्

देवदेवो मया दृष्टो भवान्साक्षात्सनातनः | यं ददासि वरं तुष्टस्तं ग्रहीष्याम्यहं पितः

जयेयं लोभमोहौ च क्रोधं चाहं सदा विभो | दाने तपसि सत्ये च मनो मे सततं भवेत्

उपपन्नो गुणैः सर्वैः स्वभावेनासि पाण्डव | भवान्धर्मः पुनश्चैव यथोक्तं ते भविष्यति

इत्युक्त्वान्तर्दधे धर्मो भगवाँल्लोकभावनः | समेताः पाण्डवाश्चैव सुखसुप्ता मनस्विनः

अभ्येत्य चाश्रमं वीराः सर्व एव गतक्लमाः | आरणेयं ददुस्तस्मै ब्राह्मणाय तपस्विने

इदं समुत्थानसमागमं मह; त्पितुश्च पुत्रस्य च कीर्तिवर्धनम् | पठन्नरः स्याद्विजितेन्द्रियो वशी; सपुत्रपौत्रः शतवर्षभाग्भवेत्

न चाप्यधर्मे न सुहृद्विभेदने; परस्वहारे परदारमर्शने | कदर्यभावे न रमेन्मनः सदा; नृणां सदाख्यानमिदं विजानताम्