Surdas Padas (Sur Sagar selections)

मूल श्लोकः

सुंदर स्याम सुजान पठायो मान दै॥ध्रुव॥ कोउ आयो उत तायँ जितै नँदसुवन सिधारे। वहै बेनु-धुनि होय मनो आए नँदप्यारे॥ धाई सब गलगाजि कै ऊधो देखे जाय। लै आईं ब्रजराज पै हो, आनँद उर न समाय॥ अरघ आरती, तिलक, दूब दधि माथे दीन्ही। कंचन-कलस भराय आनि परिकरमा कीन्हीं॥ गोप-भीर आँगन भई मिलि बैठे यादवजात। जलझारी आगे धरी, हो, बूझति हरि-कुसलात॥ कुसल-छेम बसुदेव, कुसल देवी कुवजाऊ। कुसल-छेम अक्रूर, कुसल नीके बलदाऊ॥ पूछि कुसल गोपाल की रहीं सकल गहि पाय। प्रेम-मगन ऊधो भए, हो. देखत व्रज को भाय॥ मन मन ऊधो कहै यह न बूझिय गोपालहि। ब्रज को हेतु बिसारि जोग सिखवत ब्रजबालहि॥ पाती बाँचि न आवई रहे नयन जल पूरि। देखि प्रेम गोपीन को, हो ज्ञान-गरब गयो दूरि॥ तब इत उत बहराय नीर नयनन में सोख्यो। ठानी कथा प्रबोध बोलि सब गुरू समोख्यो॥ जो ब्रत मुनिवर ध्यावही पर पावहिं नहिं पार। सो ब्रत सीखो गोपिका, हो, छाँड़ि विषय-विस्तार॥ सुनि ऊधो के बचन रहीं नीचे करि तारे। मनो सुधा सों सींचि आनि विषज्वाला जारे॥ हम अबला कह जानहीं जोग-जुगुति की रीति। अबिगत, अगह, अपार, आदि अवगत है सोई। आदि निरंजन नाम ताहि रंजै सब कोई॥ नासिका-अग्र है तहाँ ब्रह्म को बास। अबिनासी बिनसै नहीं, हो, सहज ज्योति-परकास॥ घर लागै' औघूरि कहे मन कहा बँधावै। मूरख जादवजात हैं हमहिं सिखावत जोग। बूझै निगम बोलाइ कै, कहै वेद समुझाय। ऊधो ताको न्याव है, हो, जाहि न सूझै नैन॥ हम बूझति सतभाव न्याव तुम्हरे मुख साँचो। प्रेम-नेम रसकथा कहौ कंचन की काँचो॥ जो कोउ पावै सीस दै ताको कीजै नेम। मधुप हमारी सौं कहो, हो, जोग भलो किधौं प्रेम॥ प्रेम प्रेम सों होय प्रेम सों पारहि जैए। प्रेस बँध्यो संसार, प्रेम परमारथ पैए॥ एकै निहचै प्रेम को जीवन-मुक्ति रसाल। साँचो निहचै प्रेम को, हो, जो मिलिहैं नँदलाल। सुनि गोपिन को प्रेम नेम ऊधो को भूल्यो। गावत गुन-गोपाल फिरत कुंजन में फूल्यो॥ छन गोपिन के पग धरै, धन्य तिहारो नेम। धाय धाय द्रुम भेंटहीं, हो, ऊधो छाके प्रेम॥ धनि गोपी, धनि गोप, धन्य सुरभी बनचारी। धन्य, धन्य! सो भूमि जहाँ बिहरे बनवारी॥ उपदेसन आयो हुतो मोहिं भयो उपदेस। ऊधो जदुपति पै गए, हो, किए गोप को बेस॥ भूल्यो जदुपति नाम, कहते गोपाल गोसाँई। एक बार ब्रज जाहु देहु गोपिन दिखराई॥ गोकुल को सुख छाँड़ि कै कहाँ बसे हौ आय। कृपावंत हरि जानि कै, हो, ऊधो पकरे पाय॥ देखत ब्रज को प्रेम नेम कछु नाहिंन भावै। उमड़्यो नयननि नीर बात कछु कहत न आवै॥ सूर स्याम भूतल गिरे, रहे नयन जल छाय। पोंछि पीतपट सों कह्यो, 'आए जोग सिखाय'?॥१७॥

suṃdara syāma sujāna paṭhāyo māna dai||dhruva|| kou āyo uta tāya~ jitai na~dasuvana sidhāre| vahai benu-dhuni hoya mano āe na~dapyāre|| dhāī saba galagāji kai ūdho dekhe jāya| lai āīṃ brajarāja pai ho, āna~da ura na samāya|| aragha āratī, tilaka, dūba dadhi māthe dīnhī| kaṃcana-kalasa bharāya āni parikaramā kīnhīṃ|| gopa-bhīra ā~gana bhaī mili baiṭhe yādavajāta| jalajhārī āge dharī, ho, būjhati hari-kusalāta|| kusala-chema basudeva, kusala devī kuvajāū| kusala-chema akrūra, kusala nīke baladāū|| pūchi kusala gopāla kī rahīṃ sakala gahi pāya| prema-magana ūdho bhae, ho. dekhata vraja ko bhāya|| mana mana ūdho kahai yaha na būjhiya gopālahi| braja ko hetu bisāri joga sikhavata brajabālahi|| pātī bā~ci na āvaī rahe nayana jala pūri| dekhi prema gopīna ko, ho jñāna-garaba gayo dūri|| taba ita uta baharāya nīra nayanana meṃ sokhyo| ṭhānī kathā prabodha boli saba gurū samokhyo|| jo brata munivara dhyāvahī para pāvahiṃ nahiṃ pāra| so brata sīkho gopikā, ho, chā~ḍa़i viṣaya-vistāra|| suni ūdho ke bacana rahīṃ nīce kari tāre| mano sudhā soṃ sīṃci āni viṣajvālā jāre|| hama abalā kaha jānahīṃ joga-juguti kī rīti| abigata, agaha, apāra, ādi avagata hai soī| ādi niraṃjana nāma tāhi raṃjai saba koī|| nāsikā-agra hai tahā~ brahma ko bāsa| abināsī binasai nahīṃ, ho, sahaja jyoti-parakāsa|| ghara lāgai' aughūri kahe mana kahā ba~dhāvai| mūrakha jādavajāta haiṃ hamahiṃ sikhāvata joga| būjhai nigama bolāi kai, kahai veda samujhāya| ūdho tāko nyāva hai, ho, jāhi na sūjhai naina|| hama būjhati satabhāva nyāva tumhare mukha sā~co| prema-nema rasakathā kahau kaṃcana kī kā~co|| jo kou pāvai sīsa dai tāko kījai nema| madhupa hamārī sauṃ kaho, ho, joga bhalo kidhauṃ prema|| prema prema soṃ hoya prema soṃ pārahi jaie| presa ba~dhyo saṃsāra, prema paramāratha paie|| ekai nihacai prema ko jīvana-mukti rasāla| sā~co nihacai prema ko, ho, jo milihaiṃ na~dalāla| suni gopina ko prema nema ūdho ko bhūlyo| gāvata guna-gopāla phirata kuṃjana meṃ phūlyo|| chana gopina ke paga dharai, dhanya tihāro nema| dhāya dhāya druma bheṃṭahīṃ, ho, ūdho chāke prema|| dhani gopī, dhani gopa, dhanya surabhī banacārī| dhanya, dhanya! so bhūmi jahā~ bihare banavārī|| upadesana āyo huto mohiṃ bhayo upadesa| ūdho jadupati pai gae, ho, kie gopa ko besa|| bhūlyo jadupati nāma, kahate gopāla gosā~ī| eka bāra braja jāhu dehu gopina dikharāī|| gokula ko sukha chā~ḍa़i kai kahā~ base hau āya| kṛpāvaṃta hari jāni kai, ho, ūdho pakare pāya|| dekhata braja ko prema nema kachu nāhiṃna bhāvai| umaḍa़yo nayanani nīra bāta kachu kahata na āvai|| sūra syāma bhūtala gire, rahe nayana jala chāya| poṃchi pītapaṭa soṃ kahyo, 'āe joga sikhāya'?||17||

SP 55