Surdas Padas (Sur Sagar selections)

मूल श्लोकः

हौं तुम पै ब्रजनाथ पठायो। आतमज्ञान-सिखावन आयो॥ आपुहि पुरुष, आपुही नारी। आपुहि बानप्रस्थ ब्रतधारी॥ आपुहि पिता, आपुही माता। आपुहि भगिनी, आपुहि भ्राता॥ आपुहि पंडित, आपुहि ज्ञानी। आपुहि राजा, आपुहि रानी॥ आपुहि धरती, आपु अकासा। आपुहि स्वामी, आपुहि दासा॥ आपुहि ग्वाल, आपुही गाई। आपुहि आप चरावन जाई॥ आपुहि भँवर, आपुही फूल। आतमज्ञान बिना जग भूल॥ रंक राव दूजो नहिं कोय। आपुहि आप निरंजन सोय॥ यहि प्रकार जाको मन लागै। जरा, मरन, जी तें भ्रम भागे॥ सुनु ऊधो! ह्याँ कौन सयानी?। तुम तौ महापुरुष बड़ज्ञानी॥ जोगी होय सो जोगहि जानै। नवधा भक्ति सदा मन मानै॥ भाव-भगति हरिजन चित धारे। ज्योति-रूप सिव सनक बिचारे॥ तुम कह रचि रचि कहत सयानी। अबला हरि के रूप दिवानी॥ जात-पीर बंझा नहिं जानै। बिनु देखे कैसे रुचि मानैं? फिरि फ़िरि कहे वहै सुधि आवै। स्यामरूप बिनु और न भावै॥ जोग-समाधि जोति चित लावै। परमानंद परमपद पावै॥ नवकिसोर को जबहिं निहारैं। कोटि ज्योति वा छबि पै वारैं॥ सजल मेघ घनस्याम-सरीर। रूप ठगी हलधर के बीर॥ सिर श्रीखंड, कुंडल, बनमाल। क्यों बिसरैं वै नयन बिसाल? मृगमद तिलक अलक घुँघरारे। उन मोहन मन हरे हमारे॥ भृकुटी बिकट, नासिका राजै। अरुन अधर मुरली कल बाजै॥ दाड़िम-दसन-दमक-दुति सोहै। मृदु मुसकानि मदन-मन मोहै॥ चारु चिबुक, उर पर गजमोती। दूरि करत उडुगन की जोती॥ कंकन, किंकिन, पदिक बिराजै। चलत चरन कल नूपुर बाजै॥ बन की धातु चित्र तनु किये। वह छबि चुभि जु रही हम हिये॥ पीत बसन छबि बरनि न जाई। नखसिख सुंदर कुंवर कन्हाई॥ रूपरासि ग्वालन को संगी। कब देखैं वह रूप त्रिभंगी॥ जो तुम हित की बात सुनावौ। मदनगोपालहि क्यों न मिलावौ? ताहि भजहु किन सबै सयानी? खोजत जाहि महामुनि ज्ञानी॥ जाके रूप-रेख कछु नाहीं। नयन मूँदि चितवहु चित माहीं॥ हृदय-कमल में जोति बिराजै। अनहद नाद निरंतर बाजै॥ इड़ा पिंगला सुखमन नारी। सून्य सहज में बसैं मुरारी॥ मात पिता नहिं दारा भाई। जल थल घट घट रहे समाई॥ यहि प्रकार भव दुस्तर तरिहौ। जोग-पंथ क्रम क्रम अनुसरिहौ॥ यह मधुकर! मुख मूँदहु जाई। हमरे चित बित हरि यदुराई॥

hauṃ tuma pai brajanātha paṭhāyo| ātamajñāna-sikhāvana āyo|| āpuhi puruṣa, āpuhī nārī| āpuhi bānaprastha bratadhārī|| āpuhi pitā, āpuhī mātā| āpuhi bhaginī, āpuhi bhrātā|| āpuhi paṃḍita, āpuhi jñānī| āpuhi rājā, āpuhi rānī|| āpuhi dharatī, āpu akāsā| āpuhi svāmī, āpuhi dāsā|| āpuhi gvāla, āpuhī gāī| āpuhi āpa carāvana jāī|| āpuhi bha~vara, āpuhī phūla| ātamajñāna binā jaga bhūla|| raṃka rāva dūjo nahiṃ koya| āpuhi āpa niraṃjana soya|| yahi prakāra jāko mana lāgai| jarā, marana, jī teṃ bhrama bhāge|| sunu ūdho! hyā~ kauna sayānī?| tuma tau mahāpuruṣa baḍa़jñānī|| jogī hoya so jogahi jānai| navadhā bhakti sadā mana mānai|| bhāva-bhagati harijana cita dhāre| jyoti-rūpa siva sanaka bicāre|| tuma kaha raci raci kahata sayānī| abalā hari ke rūpa divānī|| jāta-pīra baṃjhā nahiṃ jānai| binu dekhe kaise ruci mānaiṃ? phiri pha़iri kahe vahai sudhi āvai| syāmarūpa binu aura na bhāvai|| joga-samādhi joti cita lāvai| paramānaṃda paramapada pāvai|| navakisora ko jabahiṃ nihāraiṃ| koṭi jyoti vā chabi pai vāraiṃ|| sajala megha ghanasyāma-sarīra| rūpa ṭhagī haladhara ke bīra|| sira śrīkhaṃḍa, kuṃḍala, banamāla| kyoṃ bisaraiṃ vai nayana bisāla? mṛgamada tilaka alaka ghu~gharāre| una mohana mana hare hamāre|| bhṛkuṭī bikaṭa, nāsikā rājai| aruna adhara muralī kala bājai|| dāḍa़ima-dasana-damaka-duti sohai| mṛdu musakāni madana-mana mohai|| cāru cibuka, ura para gajamotī| dūri karata uḍugana kī jotī|| kaṃkana, kiṃkina, padika birājai| calata carana kala nūpura bājai|| bana kī dhātu citra tanu kiye| vaha chabi cubhi ju rahī hama hiye|| pīta basana chabi barani na jāī| nakhasikha suṃdara kuṃvara kanhāī|| rūparāsi gvālana ko saṃgī| kaba dekhaiṃ vaha rūpa tribhaṃgī|| jo tuma hita kī bāta sunāvau| madanagopālahi kyoṃ na milāvau? tāhi bhajahu kina sabai sayānī? khojata jāhi mahāmuni jñānī|| jāke rūpa-rekha kachu nāhīṃ| nayana mū~di citavahu cita māhīṃ|| hṛdaya-kamala meṃ joti birājai| anahada nāda niraṃtara bājai|| iḍa़ā piṃgalā sukhamana nārī| sūnya sahaja meṃ basaiṃ murārī|| māta pitā nahiṃ dārā bhāī| jala thala ghaṭa ghaṭa rahe samāī|| yahi prakāra bhava dustara tarihau| joga-paṃtha krama krama anusarihau|| yaha madhukara! mukha mū~dahu jāī| hamare cita bita hari yadurāī||

SP 390