Surdas Padas (Sur Sagar selections)

मूल श्लोकः

⁠जोग-सँदेसो ब्रज में लावत। थाके चरन तिहारे, ऊधो! बार बार के धावत॥ सुनिहै कथा कौन निर्गुन की, रचि पचि बात बनावत। सगुन-सुमेरु प्रगट देखियत, तुम तृन की ओट दुरावत॥ हम जानत परपंच स्याम के, बातन ही बहरावत। देखी सुनी न अब लौं कबहूँ, जल मथे माखन आवत॥ जोगी जोग-अपार सिंधु में ढूँढ़े हू नहिं पावत। ह्याँ हरि प्रगट प्रेम जसुमति के ऊखल आप बँधावत॥ चुप करि रहौ, ज्ञान ढँकि राखौ; कत हौ बिरह बढ़ावत। काहे को बिपरीत बात कहि सब के प्रान गँवावत। सोहै सो कित सूर अबलनि जेहि निगम नेति कहि गावत?॥३५७॥

⁠joga-sa~deso braja meṃ lāvata| thāke carana tihāre, ūdho! bāra bāra ke dhāvata|| sunihai kathā kauna nirguna kī, raci paci bāta banāvata| saguna-sumeru pragaṭa dekhiyata, tuma tṛna kī oṭa durāvata|| hama jānata parapaṃca syāma ke, bātana hī baharāvata| dekhī sunī na aba lauṃ kabahū~, jala mathe mākhana āvata|| jogī joga-apāra siṃdhu meṃ ḍhū~ḍha़e hū nahiṃ pāvata| hyā~ hari pragaṭa prema jasumati ke ūkhala āpa ba~dhāvata|| cupa kari rahau, jñāna ḍha~ki rākhau; kata hau biraha baḍha़āvata| kāhe ko biparīta bāta kahi saba ke prāna ga~vāvata| sohai so kita sūra abalani jehi nigama neti kahi gāvata?||357||

SP 368