Verses

सत्यं ज्ञानमनन्तं नित्यमनाकाशं परमाकाशम् । गोष्ठप्राङ्गणरिङ्खणलोलमनायासं परमायासम् । मायाकल्पितनानाकारमनाकारं भुवनाकारम् । क्ष्मामानाथमनाथं प्रणमत गोविन्दं परमानन्दम् ॥ १॥

satyaṃ jñānamanantaṃ nityamanākāśaṃ paramākāśam | goṣṭhaprāṅgaṇariṅkhaṇalolamanāyāsaṃ paramāyāsam | māyākalpitanānākāramanākāraṃ bhuvanākāram | kṣmāmānāthamanāthaṃ praṇamata govindaṃ paramānandam || 1 ||

मृत्स्नामत्सीहेति यशोदाताडनशैशवसन्त्रासम् । व्यदितवक्त्रालोकितलोकालोकचतुर्दशलोकालिम् । लोकत्रयपुरमूलस्तम्भं लोकालोकमनालोकम् । लोकेशं परमेशं प्रणमत गोविन्दं परमानन्दम् ॥ २॥

mṛtsnāmatsīheti yaśodātāḍanaśaiśavasantrāsam | vyaditavaktrālokitalokālokacaturdaśalokālim | lokatrayapuramūlastambhaṃ lokālokamanālokam | lokeśaṃ parameśaṃ praṇamata govindaṃ paramānandam || 2 ||

त्रैविष्टपरिपुवीरघ्नं क्षितिभारघ्नं भवरोगघ्नम् । कैवल्यं नवनीताहारमनाहारं भुवनाहारम् । वैमल्यस्फुटचेतोवृत्तिविशेषाभासमनाभासम् । शैवं केवलशान्तं प्रणमत गोविन्दं परमानन्दम् ॥ ३॥

traiviṣṭaparipuvīraghnaṃ kṣitibhāraghnaṃ bhavarogaghnam | kaivalyaṃ navanītāhāramanāhāraṃ bhuvanāhāram | vaimalyasphuṭacetovṛttiviśeṣābhāsamanābhāsam | śaivaṃ kevalaśāntaṃ praṇamata govindaṃ paramānandam || 3 ||

गोपालं भूलीलाविग्रहगोपालं कुलगोपालम् । गोपीखेलनगोवर्धनधृतिलीलालालितगोपालम् । गोभिर्निगदितगोविन्दस्फुटनामानं बहुनामानम् । गोपीगोचरदूरं प्रणमत गोविन्दं परमानन्दम् ॥ ४॥

gopālaṃ bhūlīlāvigrahagopālaṃ kulagopālam | gopīkhelanagovardhanadhṛtilīlālālitagopālam | gobhirnigaditagovindasphuṭanāmānaṃ bahunāmānam | gopīgocaradūraṃ praṇamata govindaṃ paramānandam || 4 ||

गोपीमण्डलगोष्ठीभेदं भेदावस्थमभेदाभम् । शश्वद्गोखुरनिर्धूतोद्गतधूलीधूसरसौभाग्यम् । श्रद्धाभक्तिगृहीतानन्दमचिन्त्यं चिन्तितसद्भावम् । चिन्तामणिमहिमानं प्रणमत गोविन्दं परमानन्दम् ॥ ५॥

gopīmaṇḍalagoṣṭhībhedaṃ bhedāvasthamabhedābham | śaśvadgokhuranirdhūtodgatadhūlīdhūsarasaubhāgyam | śraddhābhaktigṛhītānandamacintyaṃ cintitasadbhāvam | cintāmaṇimahimānaṃ praṇamata govindaṃ paramānandam || 5 ||

स्नानव्याकुलयोषिद्वस्त्रमुपादायागमुपारूढम् । व्यादित्सन्तीरथ दिग्वस्त्रा ह्युपदातुमुपाकर्षन्तम् । निर्धूतद्वयशोकविमोहं बुद्धं बुद्धेरन्तःस्थम् । सत्तामात्रशरीरं प्रणमत गोविन्दं परमानन्दम् ॥ ६॥

snānavyākulayoṣidvastramupādāyāgamupārūḍham | vyāditsantīratha digvastrā hyupadātumupākarṣantam | nirdhūtadvayaśokavimohaṃ buddhaṃ buddherantaḥstham | sattāmātraśarīraṃ praṇamata govindaṃ paramānandam || 6 ||

कान्तं कारणकारणमादिमनादिं कालमनाभासम् । कालिन्दीगतकालियशिरसि मुहुर्नृत्यन्तं नृत्यन्तम् । कालं कालकलातीतं कलिताशेषं कलिदोषघ्नम् । कालत्रयगतिहेतुं प्रणमत गोविन्दं परमानन्दम् ॥ ७॥

kāntaṃ kāraṇakāraṇamādimanādiṃ kālamanābhāsam | kālindīgatakāliyaśirasi muhurnṛtyantaṃ nṛtyantam | kālaṃ kālakalātītaṃ kalitāśeṣaṃ kalidoṣaghnam | kālatrayagatihetuṃ praṇamata govindaṃ paramānandam || 7 ||

वृन्दावनभुवि वृन्दारकगणवृन्दाराध्यं वन्दे कुन्दाभामलमन्दस्मेरसुधानन्दं सुहृदानन्दम् । वन्द्याशेषमहामुनिमानसवन्द्यानन्दपदद्वन्द्वम् । वन्द्याशेषगुणाब्धिं प्रणमत गोविन्दं परमानन्दम् ॥ ८॥

vṛndāvanabhuvi vṛndārakagaṇavṛndārādhyaṃ vande kundābhāmalamandasmerasudhānandaṃ suhṛdānandam | vandyāśeṣamahāmunimānasavandyānandapadadvandvam | vandyāśeṣaguṇābdhiṃ praṇamata govindaṃ paramānandam || 8 ||

गोविन्दाष्टकमेतदधीते गोविन्दार्पितचेता यः । गोविन्दाच्युत माधव विष्णो गोकुलनायक कृष्णेति । गोविन्दाङ्घ्रिसरोजध्यानसुधाजलधौतसमस्ताघः । गोविन्दं परमानन्दामृतमन्तस्थं स समभ्येति ॥ ९॥

govindāṣṭakametadadhīte govindārpitacetā yaḥ | govindācyuta mādhava viṣṇo gokulanāyaka kṛṣṇeti | govindāṅghrisarojadhyānasudhājaladhautasamastāghaḥ | govindaṃ paramānandāmṛtamantasthaṃ sa samabhyeti || 9 ||